A circunvalación da Nacional VI volveu ser este xoves o escenario dun aparatoso accidente de circulación, no que a condutora dun dos turismos que se viron implicados, de 43 anos de idade, tivo que ser excarcerada polos bombeiros de entre o amasillo de ferros en que quedou convertida a parte dianteira do seu vehículo. Ademais desta ferida, houbo outros dous, aínda que no seu caso de prognóstico leve.
A colisión tivo lugar ás seis menos dez da tarde no punto quilométrico 503,800 da Nacional VI, á altura do cruzamento desta estrada coa pista que conduce a unha empresa de conxelados e ao colexio Galén.
O accidente produciuse ao chocar frontolateralmente unha furgoneta de repartición de mercancía e o turismo que guiaba a condutora que foi excarcerada polos bombeiros, que circulaban cada un nun sentido.
Dous pneumáticos saltaron polo aire, tras a colisión entre unha furgoneta de repartición e o turismo da condutora rescatada
O condutor dun terceiro vehículo que transitaba pola N-VI non conseguiu frear a tempo e golpeou a un dos implicados.
UN SEGUNDO CHOQUE. Outros dous turismos que se incorporaban á estrada desde o mencionado cruzamento de Xián chocaron por alcance, tras frear o que ía diante para evitar verse envolvido no primeiro dos accidentes.
A condutora que foi excarcerada polos bombeiros foi atendida polos sanitarios dunha ambulancia do 061, que a evacuaron ao servizo de Urxencias do hospital Lucus Augusti (Hula). A ferida ía consciente.
O brutal impacto entre a furgoneta de repartición e o turismo provocou que saltasen polo aire un pneumático de cada un destes vehículos. As rodas foron retiradas polo persoal da empresa de mantemento da estrada N-VI, que ademais limpou os outros restos que quedaron esparexidos sobre a calzada.
Esta colisión provocou importantes retencións, pois esta é unha estrada moi transitada, sobre todo nos horarios que coinciden na entrada e saída do traballo. Interviñeron axentes do Subsector de Tráfico da Guadia Civil de Lugo para regular a circulación. á hora na que se produciu este accidente polo menos non chovía sobre a capital lucense.
No tramo da N-VI no que tivo lugar este xoves o contratempo, no que está permitido circular ata 80 quilómetros por hora, foron frecuentes os accidentes de tráfico hai uns anos, ata que se rebaixou o límite de velocidade e instalouse un radar fixo.
