A cadea Eurostars, que se fixo cargo do antigo Gran Hotel Lugo, retirou este luns as letras do establecemento que estaban colocadas na azotea do edificio, dentro das distintas iniciativas que está a levar a cabo o grupo hostaleiro para cambiar a imaxe deste establecemento. Probablemente, a intención será colocar unhas letras novas no mesmo lugar pero isto non puido ser confirmado este luns pola xerencia.
O Gran Hotel xa puxera un novo rótulo na marquesiña que se atopa na entrada e que inclúe xa o nome da cadea á que pertence, propiedade do grupo Hotusa. En principio, estaba previsto que, nestas datas, se renovara tamén a cafetería do hotel, que leva máis de dous anos pechada ao público aínda que o servizo de restauración corría a cargo dunha firma exterior lucense.
A cafetería, o restaurante e a cociña foron sometidos a varias obras. Tamén se renovaron as cámaras frigoríficas, as campás extractoras, o túnel de lavado e a climatización.
