A conselleira de Infraestruturas e Mobilidade, Ethel Vázquez, expresou este mércores o seu desexo de que o período de probas do Ave a Galicia sexa "o máis áxil posible", pero tamén criticou que exista unha "falta de información" por parte do Ministerio de Fomento e a imposibilidade do Goberno galego para supervisar as obras mediante unha visita oficial. Ademais do enlace con Madrid, sitúa como "obxectivo prioritario" a mellora da liña entre Ourense e Lugo.
"A Xunta segue tendo un obxectivo prioritario, compartido por todos os galegos, un obxectivo de país, que é a chegada da Ave a Galicia coa finalización das obras segundo o cronograma previsto e acordado, que é a finais de 2019", dixo a conselleira en Lugo. Así as cousas, espera que "ese período de probas sexa o máis áxil posible, para que os galegos poidan acceder a esa liña de alta velocidade que outras comunidades teñen desde hai moito tempo".
Ademais, asegurou que "nos últimos meses" o Goberno galego botou "en falta información por parte do Goberno de España". "O anterior ministro de Fomento acudía a Galicia cada tres meses para informar puntualmente sobre os avances da liña de Ave, e agora o que estamos a ter é unha falta de información por parte do Goberno de España, a pesar de tela pedido", dixo a conselleira. Tamén criticou a falta de oportunidades para "acudir a visitas de obra", a pesar de solicitadas para facer un seguimento" oficial da marcha deses traballos.
Así mesmo, recordou que para o Goberno galego tamén é un "obxectivo prioritario" a mellora da liña entre Ourense e Lugo, porque "a falta de avances preocúpanos".
En canto á estación intermodal de Lugo, recordou que "para poder licitar o proxecto da estación de autobuses" nesa terminal a Xunta necesita "información concreta do Ministerio de Fomento". "Dirixímonos hai meses ao secretario de Estado de Infraestruturas para que nos concretase cuestións técnicas e poder licitar ese proxecto", engadiu, pero "a día de hoxe sen resposta".
Vázquez destacou esta actuación "moi ambiciosa, que cambiará por completo o barrio da Residencia", e confiou en que a finais de ano se poidan comezar as obras do centro integral, que terán un prazo de execución de 20 meses.
As instalacións contarán cunha superficie de máis de 8.000 metros cadrados e terán un centro de Atención Primaria, outro de fisioterapia, urxencias, saúde mental e base para o 061.
O xerente da Xestión Integrada de Lugo, Ramón Ares, calculou que 21.000 persoas poderían ser atendidas neste centro integral, "osixenando" a atención nos centros da Milagrosa e de Fingoi unha vez rematado.
