Realizáronse os primeiros exames da convocatoria extraordinaria das probas de acceso á universidade (Abau). Na provincia de Lugo, examináronse 338 estudantes: 147 na facultade de Ade de Lugo, 138 na de Humanidades e 53 no IES Vilar Ponte de Viveiro.
Máis de 3.000 estudantes enfrontáronse a esta primeira xornada de exames en toda a comunidade. Este mércores realizáronse os exames de catro materias troncales: Lingua castelá e literatura, Historia de España, Lingua galega e literatura e o de primeira lingua estranxeira, que adoita ser inglés.
Zeltia Presas, estudante do Lucus Augusti:
"Prefiro fai a selectividade agora e non en setembro, porque así podo aproveitar o resto do verán"
É a primeira vez que estes exames se realizan no mes de xullo e non en setembro. E os estudantes mostráronse favorables ao cambio, xa que, como sostén a estudante Hio Vilanova, deste xeito teñen as materias e os exames máis recentes que ao terminar o verán. Ademais, segundo cre Zeltia Presas, estudante do IES Lucus Augusti deste xeito "todo é máis seguido e non che arruínan as vacacións de verán".
Outra das vantaxes que Hio Vilanova quixo destacar é que ao adiantar a convocatoria extraordinaria, os estudantes poderán matricularse e incorporarse ao curso universitario no mes de setembro, non como ata agora, que non podían facelo ata outubro e víanse obrigados a perder case un mes de clase.
Hio Vilanova, estudante do Lucus Augusti:
"Facer a Abau en xullo benefíciame, porque teño as materias e os exames máis frescos que en setembro"
Outros estudantes, como Pablo Díaz, Javier Ouro e Pablo García, móstranse indiferentes ao cambio, xa que se presentan "a probar sorte" pois decidiron continuar os seus estudos a través da formación profesional para a cal non necesitan nota de corte nin aprobar a selectividade.
Nos exames do primeiro día caeron temas que están á orde do día como o cambio climático e o feminismo. Nas dúas xornadas que quedan por diante realizaranse as probas por especialidades dependendo de se os alumnos fixeron o bacharelato científico-tecnolóxico, o humanístico-social ou o artístico.