A estratexia de citación para a vacina da gripe cambiou ante a elevada demanda e agora priorizar aos pacientes de risco. Os centros de saúde recibiron a inicios desta semana doses da vacina –ou vacinas porque non se pon a mesma aos menores e maiores de 65, por exemplo– pero non se administran por orde de chamada senón por pertenza ou non á poboación diana.
Ás persoas que chaman para pedir cita, se non están en idade de xubilación, embarazadas ou teñen algunha das enfermidades que lles fan máis susceptibles de agravarse en caso de ter gripe pídeselles que a deixen para máis adiante, que volvan chamar pasadas unhas semanas. Recórdaselles que a campaña se prolonga ata finais de decembro e que se reciben a dose entón estarán inmunizados para cando os casos empecen a crecer.
Algún médico tamén recoñece que se o paciente, aínda non pertencendo ao grupo diana, insiste en que quere ser citado para vacinarse, acábaselle dando vez. Pero o que se pretende agora é priorizar a quen vai primordialmente dirixida a campaña.
O que está a pasar este ano é que a mensaxe calou e fíxoo en todos os grupos: convén vacinarse da gripe ante a posibilidade dunha dobre infección dese virus e do SARS-CoV2. Como todos os anos, o Sergas iniciou a campaña insistindo na necesidade de que a poboación se vacine e, como todos os anos, pediron cita persoas con patoloxía de base para quen unha gripe pode ser máis perigosa e tamén o resto.
A avalancha na demanda foi evidente case desde o primeiro momento. Aos doce días de campaña, a área de Lugo xa administrara máis de 35.000 doses, unhas dez mil máis que o ano anterior. Unha semana despois eran 53.277 os lucenses xa inmunizados.
Para entón, a finais de outubro, os problemas de subministración eran evidentes e, con frecuencia, os pacientes queixábanse de que, a pesar de ter cita, non recibían a vacina e de que tampouco se lles aclaraba cando se lles podería administrar. Sanidade comezou a pedir á poboación de menor risco que deixase a vacina para máis adiante, insistindo na mensaxe de que a campaña continuaría ata finais de ano. Agora, os centros de saúde xa fan esa priorización.
O xerente da área sanitaria, Ramón Ares, recordou que o Sergas ten previsto recibir esta semana máis dose da vacina para menores de 65 anos, que serán repartidas entre os centros de saúde da comunidade.
