Unha patrulla da Policía Nacional detivo na madrugada de onte a dous mozos, de 19 e 23 anos, que foron arrestados por entrar a roubar nas instalacións do campo de fútbol de Montirón e esnaquizaron o coche patrulla cando eran trasladados a comisaría. A detención produciuse despois de que a Policía recibise unha chamada da central de alertas do centro deportivo comunicando que dous individuos acababan de entrar no interior das oficinas.
Os axentes acudiron ao lugar e comprobaron que unha das fiestras das instalacións estaba fracturada e no interior estaba todo revolto. Os policías fixeron unha batida pola zona e viron a dous sospeitosos saíndo dun portal próximo. Ao achegarse a darlles o alto, un deles empuxou a un axente e deuse á fuga, pero foi interceptado, do mesmo xeito que o seu compañeiro.
No traxecto a comisaría, os dous mozos causaron importantes danos no coche patrulla, tanto no biombo como nos portelos e nos marcos das portas.
