A edil de cultura, Maite Ferreiro, anunciou este venres os doce concertos das festas do San Froilán que se desenvolverán no escenario da Praza do Camiño Primitivo en Fontiñas. A concelleira recordou que o recinto estará valado e os concertos comezarán ás 21.00 horas, sendo necesario reservar previamente a entrada na web entradaslugo.es.
A primeira cita en Fontiñas será o 4 de outubro coa música electrónica de Mounqup. O día 5 actuarán os lucenses Picurruchos, a partir das 13.00 horas, e pola tarde Zeltia. O día 6 comezará a quenda dos grupos lucenses con Patuk Band, que darán a testemuña o día 7 a West Side Bones e continuará o 8 con Amolados do Miño.
O día 9 a sesión comezará ás 19.00 horas co Sanfroidance, mentres que o día 10 actuarán Queen Prol Quo e Caamaño & Ameixeiras; o 11, Old Grads e Angélica Salvi, e pechará o día 12 Margarida Mariño.
