Unha lucense que esperaba este venres o autobús urbano levou o susto da súa vida cando viu que unha escaleira, que se soltou da baca dun turismo, impactaba con forza contra a marquesiña e esnaquizaba un dos cristais laterais. A muller resultou ilesa, pero tivo que ser atendida polos servizos sanitarios debido a un ataque de ansiedade.
O suceso rexistrouse ao redor das catro da tarde do xoves, cando o condutor dun vehículo que circulaba pola rúa Casas Vellas excedeu unha das bandas de redución da velocidade e observou como se movía a escaleira que levaba na baca do turismo.
O condutor pisou de forma repentina o freo para deter o coche e evitar deste xeito un accidente, pero a escaleira soltouse de súpeto das ancoraxes e saíu proxectada cara a unha marquesiña do autobús urbano situada no lugar, provocando danos materiais no cristal dun dos seus laterais.
Ata o lugar do accidente desprazouse unha patrulla da Policía Local, que solicitou tamén a asistencia dunha ambulancia do servizo de Urxencias 061. Segundo explicou este venres o portavoz policial, os servizos sanitarios acudiron para asistir a unha muller que se atopaba "no interior do habitáculo", esperando o autobús. "A pesar de que non resultou alcanzada pola escaleira nin polos cristais, a muller viuse afectada por un estado de nerviosismo que fixo necesaria a intervención médica", sinalaron.
O suceso espertou expectación na zona, xa que o impacto da escaleira contra o cristal da marquesiña causou un gran estrondo e chamou a atención dos viandantes, así como dalgúns condutores, algún dos cales detivo o seu coche para interesarse polo incidente. O condutor do turismo que levaba a escaleira tamén se mostrou moi afectado polo sucedido.