Tres persoas co rostro totalmente cuberto asaltaron na noite do mércores ao xoves a cafetería do Hotel Torre de Núñez, sito en Conturiz, e desvalixaron varias máquinas rexistradoras. O roubo produciuse ao redor das tres de madrugada, cando a banda forzou a porta da entrada principal do establecemento cunha panca e accedeu ao interior da zona de cafetería. Unha vez alí, os asaltantes dirixíronse directamente ás rexistradoras e rebentáronas con axuda de varias ferramentas. Ao parecer, os responsables do hotel baleirarían as máquinas recentemente, polo que o botín que lograron levar os ladróns non sería demasiado cuantioso.
Tras ter coñecemento do sucedido, catro patrullas da Policía Nacional trasladáronse de inmediato á zona, pero os asaltantes xa se deron á fuga. Segundo recolleron as cámaras de seguridade da cafetería, o roubo foi cometido por tres encapuchados, que actuaron en cuestión de minutos, aínda que os axentes cren que había outro colega esperando no exterior do establecemento, no interior dun vehículo.
A Policía Nacional abriu de inmediato unha investigación para localizar canto antes aos asaltantes e as primeiras pescudas apuntarían a que o roubo puido ser obra da coñecida como banda do Seat León. De feito, os ladróns poderían acudir ao hotel nun coche desta marca cuxo roubo fora denunciado o día anterior na localidade de Sarria.
ACTUACIÓN POLICIAL. As forzas e corpos de seguridade lograran frear a actividade delituosa desta banda a finais de xuño, cando Policía Nacional e Garda Civil arrestaron a 14 membros da organización, cinco en Lugo e nove en Pontevedra. O armazón criminal estaba composto por tres grupos relacionados entre si, que roubaron polo menos 40 turismos e empregáronos na comisión de máis dun centenar de asaltos a vivendas particulares e establecementos de toda Galicia, así como de Castela e León.
O grupo especializado en asaltar naves industriais estaba fincado en Lugo e tamén era a célula especializada na subtracción dos Seat León (nalgunha ocasión tamén Audi ou Volkswagen), que utilizaban tanto para cometer aluaxes como para fuxirse tras os roubos, dificultando así a investigación policial.
Tras os arrestos, todos os detidos prestaron declaración no xulgado de Ferrol que levaba o caso e o xuíz deixounos en liberdade. Ao parecer, un dos motivos desta decisión era que nos rexistros domiciliarios practicados non se atoparon obxectos que os relacionasen directamente cos roubos investigados, ou polo menos non da entidade suficiente como para decretar o seu ingreso en prisión.
As forzas de seguridade investigan agora se a banda volveu a organizarse e podería estar detrás do asalto cometido na madrugada pasada na cafetería do hotel Torre de Núñez.
