Un empresario lucense sentou este mércores no banco dos acusados da Audiencia Provincial de Lugo e aceptou unha condena de dous anos de prisión por un delito de alzamento de bens. A acusación particular, exercida por tesourería da Seguridade Social, pedía para el unha condena de oito anos e nove meses de cárcere, mentres que a Fiscalía solicitaba o sobresemento do caso ao considerar que non se puido acreditar "unha defraudación".
O fiscal recolleu no seu escrito que o acusado tiña unha débeda coa Seguridade Social, pero considerou que non había indicios de engano. "Queda acreditado que existe unha débeda pendente de cumprimento; crédito que é exixible, pero non constitutivo de delito", explicou. A acusación particular, con todo, considerou probado que o acusado creou diversas empresas -todas elas dedicadas á montaxe de rótulos e valos comerciais- "con ánimo defraudatorio". Así, entre os anos 2010 e 2015, o home deixou de ingresar multitude de cotas á Seguridade Social e realizou varias transferencias de bens e de actividade entre as súas empresas, creando unha nova cada vez que outra acumulaba débedas, "dificultando así que os acredores puidesen cobralas", sinalou.
O xuízo por estes feitos íase a celebrar este martes pola mañá na Audiencia Provincial de Lugo, pero acusación e defensa chegaron a un acordo de conformidade. O empresario recoñeceu os feitos ante o tribunal e as partes fixaron a condena en dous anos de prisión e acordaron igualmente o pago de 115.263 euros en concepto de responsabilidade civil. O letrado da defensa solicitou ademais que lle suspendan a pena, xa que o acusado non tiña antecedentes penais ata a data.
A tesourería da Seguridade Social acusaba tamén inicialmente á esposa do empresario, ao considerar que participara activamente no alzamento de bens e na creación dun "grupo de empresas opaco" creado "con ánimo defraudatorio".
A acusación particular pedía inicialmente para a muller as mesmas condenas que para o seu marido: seis anos de cárcere por un delito contra a Seguridade Social, outros dous anos e medio de prisión por un delito de frustracion na execución do artigo 257.1 do Código Penal (alzamento de bens) e tres meses máis por outro delito de frustración na execución do artigo 258.2 do mesmo precepto legal, ademais dunha multa millonaria, que superaba o séxtuplo da cantidade defraudada á administración pública.
Con todo, a acusación particular decidiu onte retirar todos os cargos contra a muller, polo que foi absolta.
