Coller a Freire foi durante décadas para miles de universitarios lucenses que estudaron en Santiago de Compostela sinónimo de que viaxaban en bus á capital galega ou de que regresaban a casa desde ela. Ese devandito pasará á historia. A Xunta de Galicia acaba de adxudicar esta liña regular de transporte de pasaxeiros por estrada á Ute formada polo grupo lucense Monbus e Alsa, segundo informaba este venres a Consellería de Infraestruturas e Mobilidade.
A centenaria Empresa Freire, fundada en 1911, prestaba este servizo desde hai uns 75 anos. Cando se produza este cambio de titularidade, quedará o servizo entre Santiago e Sobrado dos Monxes.
Antes de que se construíse hai medio século a estación de autobuses da capital lucense, a súa parada estaba fronte á Porta da Estación, no cruzamento da Rolda da Muralla coa Rúa Castelao.
Prevese que a nova adxudicataria se podería facer cargo da liña Lugo-Santiago en decembro ou en xaneiro. A concesión contempla que se modifiquen os horarios para ofrecer unha maior cobertura —actualmente hai seis saídas desde a capital lucense as fins de semana e oito os días laborais— e que se melloren os enlaces co aeroporto de Lavacolla.
O billete entre Lugo e Santiago custa 9,75 euros. A empresa ofrece cartóns que abaratan ese importe.
Todos os servizos desta liña terán que circular pola estrada Nacional 547 e pola autovía A-54.
XACOBÚS. A nova adxudicación leva aparellada tamén a prestación dun servizo de novo cuño, o Xacobús, que discorrerá pola contorna do Camiño Francés, entre Pedrafita do Cebreiro e a estación de autobuses da capital galega.
A MariÑA. A mesa de contratación da Consellería de Infraestruturas e Mobilidade adxudicou ademais a liña que enlaza A Mariña coa capital lucense, que seguirá prestando a multinacional Arriva, así como a que vai desde Viveiro ata A Coruña.
