Os 11 empregados da empresa Cechalva, concesionaria do servizo municipal de guindastre, non cobrarán este xoves a súa nómina como todos os días 30 de cada mes. Así llo comunicou ao persoal o propietario, o empresario Manuel Santiso, quen alega que a firma chegou a unha situación límite de falta de liquidez porque o Concello débelle sete mensualidades deste servizo, uns 300.000 euros en total.
O polémico contrato con Cechalva, que está a ser investigado no marco da operación Pokemon, finalizou en novembro de 2015 e desde entón os pagos do Concello á empresa fóronse atrasando polos reparos de legalidade do interventor municipal, que non autorizaba os abonos se non se descontaba a cantidade correspondente á amortización do material, como poden ser os guindastres, xa que unha vez finalizado o contrato pasaron a ser de propiedade municipal. Con todo, durante este tempo a empresa fixo fronte puntualmente aos pagos de nóminas aos traballadores, aínda que a situación chegou o mes pasado ao límite despois de que durante o último pleno fose bloqueado pola oposición o recoñecemento extraxudicial de crédito no que ía incluída unha factura por importe de 43.385 euros.
Esta minuta volveu este xoves a pleno xunto a outras 5.000 pendentes de pago por parte do Concello, aínda que finalmente foi rexeitada na sesión. O dono da empresa explicaba aos traballadores que, se se autorizaba este abono, no prazo de 15 días -tempo que calcula que tardará en ser ingresada a cantidade na conta de Cechalva- podería pagar a nómina de marzo aos empregados.
O empresario explicou que coa liquidez actual a firma só pode fai fronte ás cotas da Seguridade Social dos traballadores -que se non se abonan en tempo carrexan unha recarga- e a compra de gasóleo para os guindastres. Con todo, o resto de pagos parece que tamén terán que ser suspendidos, xa que desde hai sete meses os únicos ingresos que ten Cechalva son os procedentes do cobro de taxas de enganche e custodia de vehículos retirados da vía pública, iso a pesar de que a campaña de multas Aparca con xeito supuxo un aumento importante do número de enganches realizados.
GOBERNO LOCAL. Pola súa banda, a concelleira de economía, Ana Prieto, asegura que o Concello só debe nestes momentos dúas facturas por dúas mensualidades a Cechalva, mentres que o resto «están aínda en fase de tramitación» por parte dos técnicos municipais.
