A empresa DH Eco Enerxías, con sede en Boadilla del Monte (Madrid), implantará no polígono industrial do Ceao unha rede de distrito desde a que fornecerá enerxía térmica, orixinada a partir de fontes renovables, á cidade para calefacción e auga quente.
O Concello de Lugo facilitará a instalación desta central produtora. A alcaldesa Lara Méndez este luns un convenio de colaboración co director técnico da firma, Teodorino López, para axilizar os trámites administrativos para a súa posta en marcha.
Esta rede, segundo a explicación ofrecida polo goberno local, utilizará tecnoloxía de combustión de biomasa e enerxía eléctrica, procedente de fontes renovables, para producir auga quente, tanto para calefacción como sanitaria, e que dará servizo a edificios residenciais e a centros educativos, sanitarios e administrativos, entre outros.
O edil de sustentabilidade urbana, Álvaro Santos, explicaba que con este sistema os usuarios poden aforrar "un 20%" nos custos.
DH Eco Enerxías, que xa está a desenvolver proxectos similares ao da capital lucense nunha decena de cidades españolas, constituirá unha sociedade mercantil en Lugo
CAPTACIÓN DE EMPRESAS. "Lugo comeza a converterse xa nun polo de atracción de investimentos verdes, como é o noso obxectivo", afirmaba este luns Lara Méndez, que recordaba o seu "firme compromiso de mellorar a calidade de vida das e dos lucenses, un benestar e un coidado que debe ir en consonancia co da cidade e a saúde do planeta".
O rexedor local aposta por promover " actuacións sectoriais que transformen Lugo, que reconduzan os nosos patróns de consumo e hábitos cara pautas e opcións, que as hai, moito máis respectuosas co medio ambiente", o que enmarca dentro da "loita contra o cambio climático".
Tamén destacaba que esta iniciativa será "dinamizadora da economía e o emprego local, xa que para a construción e mantemento da central contratarase preferentemente a veciñas e veciños do municipio". Ademais a empresa contará cos servizos de orientación laboral do Concello, tanto na fase de construción da central como para o seu mantemento.
DH Eco Enerxías, que xa está a desenvolver proxectos similares ao da capital lucense nunha decena de cidades españolas, constituirá unha sociedade mercantil en Lugo e o Concello proporá a súa declaración de interese municipal e de utilidade social.
Mentres este proxecto de iniciativa privada dá os seus primeiros pasos no Ceao, outro público de enerxías renovables, o dos paneis fotovoltaicos posto en marcha polo Concello neste polígono fai máis dunha década, segue atascado.
