A Policía Nacional investiga a un veciño de Lugo acusado dun delito de estafa por haberse levado de forma ilegal un coche que previamente empeñara.
Segundo relata nun comunicado a comisaría luguesa, o investigado, de 37 anos de idade e que conta con antecedentes por feitos similares, acudiu a pasada semana a unha casa de empeños para deixar alí o seu vehículo a cambio dunha suma de diñeiro.
A operación levou a cabo cos correspondentes documentos. Ao non realizar os pagos correspondentes, o establecemento procedeu a vender o coche a un novo propietario.
O agora investigado aproveitou que o vehículo fora levado a un taller para someterse a unha reparación para levarllo da rúa onde permanecía estacionado usando un xogo de chaves que aínda conservaba.