O programa de Cuatro En el punto de mira dedicou este martes unha das súas reportaxes aos estafadores de coches. Vendedores de automóbiles de diferentes puntos de España que foran denunciados por algúns dos seus clientes foron o obxectivo dos xornalistas do espazo televisivo.
Entre eles, dous traballadores de Cuatro achegáronse ás instalacións nas que Eloy Castro vende motocicletas, automóbiles e maquinaria agrícola en Lugo. O recibimento foi pouco amigable. Despois de pechar con chave á xornalista e o cámara no seu concesionario, espetoulles: "Ti imaxínate, agora téñovos aquí encerrados. ¿E se vos mato aos dous, que pasa?". E continuou: "Eu son unha persoa moi tranquila, pero teño un temperamento que como toquen ese puntiño... Eu son un puto currante, que me paso toda a miña vida currando. Eu veño aquí á primeira hora da mañá".
Castro invitou despois aos dous profesionais a pasar ao seu despacho, onde se realizou unha entrevista na que a xornalista se interesou por algúns dos casos polos que fora denunciado. Castro eludiu as súas responsabilidades e culpou en todo momento aos clientes, chegando a confesar incluso que dalgúns dos temas polos que era cuestionado non os recordaba, debido á cantidade de casos de queixas que acumulaba. "Son tantas cousas que xa non me acordo", asegurou.
"As marcas para as que traballei sempre estiveron encantados comigo", asegurou Castro. Aínda que a xornalista recordoulle que John Deere, que lle prohibiu usar o seu nome no seu concesionario, non estaba tan satisfeito co seu traballo.
No programa, fixéronse eco de dous testemuños que se queixaban de ser estafados polo vendedor lucense. Un dos casos referíase á venda dun BMW que non levaba gran parte das características que lle prometeu e outro era dun vehículo agrícola, co que o cliente estivo a piques de ter un accidente que lle puido costar a vida.
