A nova presidenta da Deputación de Lugo, Elena Candia López, do PP, tivo este xoves o seu primeiro contacto formal cos traballadores que estarán baixo as súas ordes, logo de ser elixida no axitado pleno celebrado o mércores.
Candia explicou que era a súa intención que o primeiro acto como presidenta fose visitar aos traballadores, para "transmitir a maior normalidade", aínda que a súa idea é levar a cabo "outra forma de facer política", en referencia aos oito últimos anos baixo o mandato do socialista José Ramón Gómez Besteiro.
Trátase, dixo a tamén alcaldesa de Mondoñedo, de "un acto sinxelo", co que pretende resaltar que "ningún político que queira facer o seu proxecto pode ir separado dos seus traballadores".
A nova presidenta anticipou que o seu grupo "ten un proxecto e outra forma de facer política nesta institución". "A folla de ruta está marcada", resaltou. Aludiu en concreto aos temas aos que o PP non puido acceder nos seus oito anos na oposición, razón pola que, reiterou, insistiu na "transparencia".
Elena Candia sinalou que a posibilidade de que PSOE e BNG (13 deputados) presenten unha moción de censura contra o PP (12) non vai condicionar o seu traballo. "O único pacto que temos é cos veciños desta provincia, cos que nos votaron e cos que non nos votaron", engadiu.
