O xuíz descarta impor novas restricións ao feiral de San Froilán

O Xulgado do Contencioso Administrativo Número 1 de Lugo desestimou o incidente de execución de sentenza promovido por unha organización veciñal que buscaba a implantación de medidas máis restritivas para controlar o ruído que produce o feiral das festas patronais de San Froilán –declaradas de Interese Turístico Nacional– na contorna do Parque de Rosalía de Castro.

O propio goberno local, que entende que esa resolución lle dá a razón e ampara as medidas implantadas polo Concello para controlar o exceso de ruído no feiral, foi o que deu a coñecer o contido desa decisión do contencioso administrativo.

O Xulgado rexeita fixar un máximo de concertos a celebrar na Praza Horta do Seminario, así como obrigar ás tómbolas ou outras atraccións a funcionar sen música ou a afastarse cen metros de edificios habitados; ademais de rexeitar a implantación dun "fío musical único" para todo o recinto feiral.

Recoñece que o "dispositivo" da Policía Local encargado da "vixilancia e cumprimento" da normativa de emisión de ruídos no caso das atraccións feirais podería terse realizado "de forma máis exhaustiva".

En todo caso, logo dunha vista celebrada o pasado 19 de abril, o Xulgado entende que "o grao de contaminación acústica durante as festas de San Froilán reduciuse sensiblemente" por mor das medidas "cautelares" aplicadas por orde xudicial. "A melloría é manifesta na rúa García Portela, o cal redunda en beneficio dos residentes da zona, sobre todo se se ten en conta que é lugar de paso frecuente e habitual cara ás casetas do polbo", engade.

Por iso, e ante "a imposibilidade de determinar o grao de imputabilidade do nivel de ruído xerado no recinto feiral ás atraccións existentes ha de conducir a desestimar o incidente de execución", conclúe. De todos os xeitos, recórdalle á administración local a súa obrigación de "cumprir os mandatos xudiciais" e as "obrigacións impostas" mediante "sentenza firme" para controlar o ruído no feiral.