O Concello abrirá esta semana o prazo para solicitar praza nas súas catro garderías para o próximo curso, nas que ofrecerá 238 prazas, aínda que só 142 son para nenos de novo acceso. Dos restantes, 84 son para nenos que xa están nos centros e continuarán e 12 son prazas que quedan reservadas para casos de urxencia social. "Só ocúpanse nestes casos, pero case todos os anos temos algún", explicou a concelleira de educación, Esther Muñoz, que compareceu acompañada do alcalde, José López Orozco.
O rexedor recordou que a atención a nenos de 0 a 3 anos non é unha competencia propia dos concellos, senón da Xunta, pero o de Lugo apostou por asumilas hai anos, ante a demanda que había na cidade e a falta de resposta do Goberno galego. Orozco mostrouse "orgulloso" de tomar esa decisión no seu momento e anunciou que se o Tribunal Constitucional ditamina que a lei de 2013 que retirou competencias aos concellos é declarada institucional e este asunto queda definitivamente en mans das adminitraciones locais, o Concello de Lugo construirá máis escolas infantís. Durante os gobernos de Orozco, o Concello construíu tres garderías municipais –xa había unha–, ás que hai que sumar outras dúas da Xunta. Con todo, o total de prazas son insuficientes para a demanda existente na cidade. O alcalde recalcou que o Concello fai fronte case na súa totalidade ao custo de funcionamento das garderías municipais, cunha "pequena colaboración" da Xunta.
Respecto das prazas de novo acceso, Muñoz explicou que, para o tramo de 3 meses a un ano, hai sete prazas en cada unha das catro garderías. Para o tramo de 1 a 2 anos, hai catro prazas por escola. E para o tramo de 2 a 3 anos hai 26 prazas en todos os centros menos no da Piringalla, onde só hai 20.
A novidade deste ano é que, no canto de asignar as prazas en función da proximidade do domicilio familiar, os pais poderán indicar que centro prefiren, ordenándoos de 1 a 4. "Facémolo para facilitar a conciliación familiar e laboral, porque detectamos que, ás veces, por cuestións organizativas, os nenos dormen algún día en casa de avós, de tíos...", explicou a concelleira.
Polos centros municipais pasaron ata agora 1.928 nenos. A primeira gardería foi a de Serra de Outes, inaugurada en 1997, e as outras tres abriron nos cursos 2010–2011 e 2011–2012 e están repartidas pola cidade, na Piringalla, Sanxillao e Sanfiz.
