O BNG parodia na Praza Maior de Lugo o debate a catro desta noite

O BNG realizou este mediodía no fornelo da Praza Maior de Lugo, onde habitualmente actúa a banda de música municipal, unha parodia do debate a catro que esta noite protagonizarán os líderes do Partido Popular, o PSOE, Podemos e Ciudadanos, para pór de manifesto que "Galicia non está" na política nacional.

Para parodiar o debate, unha moderadora fíxose cargo de expor os temas a catro candidatos ficticios á Presidencia do Goberno, cada un coa careta dos verdadeiros aspirantes: Mariano Rajoy, Pedro Sánchez, Pablo Iglesias e Albert Rivera.

Ao finalizar a parodia, tomou a palabra o candidato ao Congreso pola provincia da Coruña Carlos Callón, que invitou aos televidentes a que esta noite sigan o debate a catro a "coller un cronómetro" para medir o tempo que dedica cada un dos candidatos a falar "dos problemas de Galicia".

En todo caso, xa avanzou o resultado desa medición e dixo que será "cero", porque "Galicia non está", a diferenza do que ocorre con outros territorios do Estado español como "Cataluña ou Andalucía".

Callón terminou a súa intervención afirmando que o BNG quere un "país de futuro" e que "Galicia está se o BNG está".

A portavoz nacional do BNG, Ana Pontón, asegurou que o seu partido presenta "a candidatos reais, que pasean polas rúas de Galicia e coñecen os seus problemas", fronte "aos candidatos de plasma" que propoñen outras formacións políticas.

Recordou que os galegos aspiran a algo máis que a ser "espectadores" e asegurou que o BNG quere ser "decisivo na política estatal" nun escenario no que, previsiblemente, non haberá maiorías absolutas.

"Galicia importa e Galicia non se vende", engadiu, á vez que asegurou que os galegos "están cansos de ver como os catro magníficos se rin deles".

A candidata ao Congreso pola provincia de Lugo Olalla Rodil animou aos electores a apostar por "forzas que teñen a súa mirada posta aquí" e que non pretenden ser "a muleta de ninguén", senón un partido "útil" para que "este país teña un futuro".