O grupo municipal do BNG en Lugo criticou este sábado a "paralización" de actividade que se vive no Concello, o mesmo que fixo o PP o xoves. Tanto o naci0nalista Rubén Arroxo como o popular Jaime Castiñeira critican a falta de "xestión" cando se cumpren dúas semanas da toma de posesión da socialista Lara Méndez como alcaldesa.
Este sábado, Arroxo considerou necesario que a alcaldesa "se poña a traballar" ante a "paralización" da actividade que, na súa opinión, se dá no Concello de Lugo. Lara Méndez, engade o BNG, "aínda non fixo ningunha proposta de organización da corporación nin convocou aos portavoces dos grupos municipais".
O xoves, o portavoz municipal do PP, Jaime Castiñeira, instou á alcaldesa a tomar xa medidas tras 15 días no cargo, porque un concello "é xestión" e a concesión de licenzas "non pode estar pendente do que decida unha asemblea", en alusión á negociación do pacto de goberno con Lugonovo.
Castiñeira sostivo que o labor da alcaldesa non é só "saír en fotos e acudir a inauguracións", porque di que agora os cidadáns non saben a quen dirixirse cando van ao Concello, ao non estar repartidas as concellarías.
O BNG lucense avanzou que presentará unha proposta para reducir en 250.000 euros o gasto político do Concello. "Trátase dunha redución importante se temos en conta que se duplicou o número de grupos municipais", explicou Arroxo. A proposta contempla "unha dotación de medios equitativa para todos os grupos con representación na corporación e unhas asignacións económicas suficientes e sostibles".
En canto a Lugonovo, que o luns volverá negociar se entra no goberno local co PSOE, a formación convocou para as oito da tarde deste martes unha asemblea xeral. Nela informarase sobre a reunión do luns cos socialistas e debaterase e votará se a formación comparte responsabilidades de goberno cos socialistas.
