O Eixo Atlántico ten un plan para renovar a liña férrea entre A Coruña e Lugo e conseguir que as mercancías que entran polos portos do norte ou se xeren en Galicia salgan cara a Europa a través de Monforte. Trátase dun estudo de opcións e custos que será presentado o vindeiro venres na sede da Deputación e que foi cualificado como "factible" por Xoán Vázquez Mao, secretario xeral do grupo de cidades galaico-portuguesas.
O anuncio desta nova iniciativa para modernizar o decimonónico trazado ferroviario da provincia realizouse no consistorio lucense tras a reunión da comisión executiva do Eixo Atlántico, onde quedou fixado a orde do día da próxima asemblea da organización, que se celebrará en febreiro na localidade lusa de Matosinhos.
Vázquez Mao, que compareceu ante os xornalistas acompañado da alcaldesa de Lugo, Lara Méndez; o rexedor de Braga, Ricardo Río, e o presidente do Eixo Atlántico, Alfredo García, comentou que ademais do proxecto para o ferrocarril Lugo-A Coruña, tamén segue "sobre a mesa" do Ministerio de Fomento o estudo que presentaron hai tres anos para modernizar a liña férrea entre Lugo e Ourense, e recordou que tanto o anterior ministro como o actual están ao tanto do mesmo.
O secretario xeral tamén destacou que o Eixo, que aglutina a 34 municipios -17 galegos e 17 lusos- e á Deputación de Lugo, seguirá reivindicando melloras no ferrocarril do corredor atlántico, de modo que se aposta por facer ·presión ao novo Goberno ata completar todo ou mapa ferroviario de Galicia".
En todo caso, recordou que a parte portuguesa deste proxecto tamén vai con atraso, polo que se falará co Executivo luso dado que "é crucial" que se lle soliciten a Bruxelas os fondos europeos no ano 2021.
UN COMPETIDOR. Neste sentido, Vázquez Mao alertou de que se os gobernos deixan pasar este prazo terán que pasar outros sete anos ata que se poidan volver solicitar os fondos e, aínda por riba, recordou que o corredor atlántico compite en España co mediterráneo para tratar de conseguir a axuda europea.
De todos os xeitos, o secretario xeral do Eixo confiou en que a eurorrexión galaico-portuguesa poida beneficiarse do feito de que a nova comisaria europea que xestiona os fondos proceda do Norte de Portugal, polo que confía en que sexa máis sensible aos problemas que afectan a esta zona do noroeste de Europa.
Ademais, Vázquez Mao dixo que continuarán demandando desde organización transfronteiriza que os municipios de menos de 20.000 habitantes e que son cabeceira de comarca poidan optar a fondos europeos, dado que considera que pola contra é imposible que poidan facer políticas para fixar poboación.
