O consello escolar do colexio Casás emitiu o martes dez votos a favor da revogación da directora do centro, Isabel Ferreiro, que se atopa actualmente de baixa, e un en contra. O trámite é un paso máis dentro do proceso de destitución que iniciou a delegación territorial de Educación por mor dun expediente que se abriu hai meses sobre a achega de oito euros ao mes que as familias facían ao comedor. No seu momento, algúns pais sinalaron que era voluntaria e que se había instituido antes de que Ferreiro asumise o cargo, mentres que Educación matizou que "non se pode privar do servizo a quen decida non facela e moito menos obrigar ao seu pagamento".
O informe do consello escolar é obrigatorio neste procedemento, aínda que non vinculante, e agora ábrese un prazo para que a directora presente alegacións. Logo a xefatura tomará unha decisión definitiva.
No caso de que a revogación sexa firme nomearase, de forma accidental, a un titular do cargo que será, con moita probabilidade, a actual substituta. De face ao próximo curso abrirase o procedemento ordinario para nomear un novo responsable.
O martes un grupo de nais concentrouse ante o colexio en apoio da directora e hai uns meses presentáronse 192 firmas na Xunta ao seu favor.
