Un coche patrulla da Policía Nacional viuse envolto na noite deste martes nun espectacular accidente ocorrido no cruzamento da Avenida da Coruña coa rúa Río Narla, no que os dous axentes que ían no vehículo policial resultaron feridos leves, igual que o condutor do outro coche.
O accidente ocorreu pouco antes das dez de noite cando o patrulleiro, que acudía coas luces de urxencia acendidas a atender unha alerta polo incendio dun vehículo na rúa Río Mera, xunto á Praza de Alacante, ao pasar á altura de Río Narla, chocou frontolateralmente con outro coche que se incorporaba á Avenida da Coruña, segundo algunhas testemuñas, porque tiña o semáforo en verde.
Por mor da colisión, o patrulleiro acabou sobre a beirarrúa e un dos dous axentes que viaxaban no coche tivo que ser trasladado ao hospital en ambulancia afectado dunha dor cervical.
O accidente mobilizou a varias unidades da Policía Nacional e da Policía Local, así como aos dous guindastres municipais, que procederon a retirar os vehículos sinistrados no medio da expectación dos condutores e peóns que pasaban a esa hora pola zona.
Mentres, outros coches patrulla e os bombeiros desprazáronse ata a rúa Río Mera, onde un vehículo comezara a arder por circunstancias que se descoñecen cando estaba aparcado, segundo relatou o seu propietario.
