A radiografía electoral de Lugo nos comicios xerais do pasado domingo debuxa un donut case perfecto.
O triunfo do PSOE no municipio cun 34,29% dos votos cimentouse nos barrios extramuros da cidade, onde o vermello socialista se impón en case todas as seccións.
A excepción azul, é dicir, popular, tradúcese nun buraco no centro da urbe de correspondencia case absoluta co Lugo intramuros, que se estende tamén ás veciñas zonas de Recatelo e Ramón Ferreiro, segundo se aprecia no mapa electoral rúa a rúa que publica El País.
Nalgunha sección do centro histórico, como a que abarca desde a Praza Santo Domingo á Maior, incluíndo Campo Castelo e A Tinería, o respaldo aos populares supera incluso o 38%.
O PP, que na cidade obtivo un 25,87% dos votos, completa o seu celeiro de apoios co Lugo rural, onde se impón, sección a sección, de forma absoluta.