A atención e coidado de cans e gatos xera moita roupa que lavar e esas pezas adoitan levar adheridas pelusas e residuos, polo que desde esta compañía destácase que a doazón de lavadoras profesionais "axudará a garantir un ambiente limpo e seguro evitando incluso o risco de transmisión de bacterias entre os animais".
Antes o albergue utilizaba lavadoras domésticas que teñen unha capacidade menor e programas de lavado máis longo, agora con esta doazón poderá "lavar a diario dunha forma máis áxil e segura mantas, toallas e pezas de animais", segundo explica a voluntaria Ana Lage, que xestionou esta doazón.
BREXIT. A Protectora de Animais de Lugo, que conta cuns 150 cans nos seus caniles, continúa coas adopcións internacionais. "Holanda e Alemaña son os seus últimos destinos", explica o seu vicepresidente, Alberto Losada.
Esta sociedade tamén está a sufrir as consecuencias da saída do Reino Unido da Unión Europea. Este era o principal destino das adopcións internacionais, pero se arrefriou debido ás trabas polo Brexit.
Alberto Losada asegura que "o que máis lle urxe" á Protectora é resolver canto antes a localización do albergue dado que as súas instalacións están "obsoletas2, que asegura que está en vías de solución.
Este directivo móstrase a favor de que o albergue poida continuar no seu emprazamento de Muxa, debido a que podería dispor duns terreos de 43.000 metros cadrados, o que posibilitaría acondicionar zonas de paseo pechadas. No antigo matadoiro municipal contaría con case catro veces menos de superficie, uns 13.000 metros cadrados.
