A alcaldesa de Lugo, Lara Méndez, mantivo este domingo en Barcelona un atopo empresarios e representantes de varias asociacións patronais a quen lles explicou o proxecto Lugo Transforma. O obxectivo do encontro, segundo o goberno local, era captar o interese investidor entre os asistentes para que participen no fondo de capital e promover a diversificación industrial da cidade.
A rexedora lucense explicou que Lugo é unha "cidade punteira" na loita contra o cambio climático e no aproveitamento de recursos propios, algo que considera que fortalece "a nosa marca Lugo sostible, que xa ten conseguido importantes recoñecementos a nivel nacional e internacional".
A reunión celebrouse no marco das festas de San Froilán de Nou Barris na cidade condal e estiveron presentes representantes dos sectores das enerxías renovables, a construción, os gremios da cultura e hostalería, así como diferentes emprendedores. Asistiron membros da Asociación de Empresarios Galegos de Cataluña (Aegacat), Asociación de Empresarios Galegos das Ribeiras do Ebro, Asociación Mundial de Empresarios Galegos, Asociación Catalá de Executivos, entre outros.
Méndez destacou que Lugo Transforma "nace coa vocación de pular pola diversificación industrial de Lugo, atraer novos negocios e, sobre todo, xerar emprego de calidade, en sectores estratéxicos, de alto impacto social e medio ambiental. Estamos a investir 12 millóns de euros vinculados coas acenos de identidade e a marca sostible", dixo a rexedora.
