Os erros rexistrados na facturación do consumo de auga foron a queixa ao Concello máis común durante o pasado mes de agosto, segundo constatouse durante a reunión da comisión municipal de reclamacións e suxestións.
En total, recibíronse no rexistro do Concello nove reclamacións de abonados que esixían a revisión dos seus pagos pendentes, despois de que fosen acumulados nun mesmo recibo varios trimestres de consumo. Ademais do problema que xera a algunhas familias afrontar o abono o mesmo mes de varios recibos atrasados, o feito de que o Concello penalice progresivamente un maior consumo de auga provoca que os afectados paguen máis polos metros cúbicos facturados en varios trimestres que se fosen contabilizados por separado.
Ademais, a atención recibida por parte dalgúns cidadáns en varios servizos municipais tamén é obxecto de queixa por parte dos lucenses, en especial o reducido horario que chegou a haber na área de arquitectura, só de 12.00 a 14.00 horas.
Así mesmo, tamén hai peticións para que se arranxen infraestruturas deterioradas, como o campo de béisbol do Ceao ou o firme de rúas como Río Eo, Reverendo Xosé Fernández ou Alexandre Bóveda.