Unha nova piscina e máis prazas de aparcadoiro son os principais proxectos que manexa para os próximos catro anos a directiva do Club Fluvial de Lugo, que será proclamada este sábado pola xunta electoral, unha vez que concluíu o prazo sen que concorrese outra candidatura.
Tito Valledor, que seguirá presidindo a entidade, explicou que está a estudar construír unha nova piscina, debido "á demanda que hai" e a que o parque acuático "está saturado" no verán.
A alternativa que se baralla é que sexa unha piscina "versátil", segundo asegurou o presidente do Club Fluvial, para que sexa cuberta no inverno e ao aire libre no verán. A súa posible localización sería na zona próxima ao angar de piragüismo e ás pistas de tenis, non nas inmediacións das actuais.
As piscinas exteriores abrirán o próximo día 14, coincidindo co Arde Lucus. A directiva tiña previsto polas en servizo este venres, pero a inestabilidade meteorolóxica fíxolle recapacitar e atrasalo.
Tito Valledor tamén anunciou que a directiva ten varias opcións para ampliar o número de prazas de aparcadoiro, porque considera que as actuais son "insuficientes" e "limitan" a afluencia de socios ao club.
A entidade da Ponte está á espera de que a Confederación Hidrográfica do Miño-Sil lle autorice as obras para acondicionar o aparcadoiro da zona de piragüismo, que suporán 85 prazas máis, e para reparar a piscina exterior dos máis pequenos.
Esas obras van aparelladas a que o organismo de conca lle renove ao Club Fluvial, durante 50 anos, a concesión de ocupación desa zona de baño. Este trámite administrativo aínda se fará esperar.
O presidente apuntou, que ademais de dotar á entidade doutra piscina e de máis prazas de aparcadoiro, o obxectivo é "ampliar os servizos e mellorar a súa calidade".
MEMBROS. A nova directiva do Club Fluvial, que é continuista, estará integrada por Tito Valledor, como presidente; Gregorio Ramos Misioné, vicepresidente; Alejandro Cuadros, secretario; Álvaro Gasalla, tesoureiro; José Manuel Núñez, contador; Susana Gutiérrez, vicesecretaria, e Manuel Castiñeira, José Ramón Busto, Luisa Ibáñez, José Luis Álvarez González, Jesús Gandoy e José Luis Rois, como vocais.
O presidente, que agradeceu a "confianza" depositada na súa lista polos socios, explicou que as novas incorporacións "reforzan a directiva", porque, ao seu xuízo, teñen "un coñecemento profundo do club".
A directiva celebra este mércores unha comida institucional co secretario xeral para o Deporte, José Ramón Lete, para darlle a coñecer os seus próximos proxectos.
