O Centro de Formación Audiovisual (CFA) —antiga Escola de Imaxe e Son— da Deputación de Lugo mírase no espello da Escola de Cine Elías Querejeta, que depende da Deputación Foral guipuscoana, co fin de adaptar o seu modelo educativo ás novas demandas formativas do sector.
Esta escola donostiarra converteuse en só tres anos —foi creada en 2017— nun referente na docencia cinematográfica cos posgraos de Creación, Arquivo e Comisariado, que a Universidade do País Vasco recoñece como másteres propios.
O deputado provincial de promoción económica e social, Pablo Rivera, e a directora do CFA, Margarita Soilán, visitaron a Escola de Cine Elías Querejeta para coñecer como funciona. Acompañounos o director de O que arde, Oliver Laxe, que, segundo o organismo provincial lucense, é "uns dous impulsores de que se reformule o seu modelo educativo".
O laureado director con raíces naviegas imparte esta semana neste centro vasco a materia azar e control, dentro do posgrao de Creación.
Pablo Rivera destacou que Lugo conta con moito "talento audiovisual, como quedou acreditado co recoñecemento a profesionais lucenses nos Premios Goya, nos Premios Feroz ou no Festival de Cannes".
Oliver Laxe é un dos impulsores de que o organismo lucense reformule o modelo educativo da súa escola
O deputado provincial dixo que co novo impulso que o organismo lucense lle quere dar ao seu centro de Formación Audiovisual aposta por manter "o talento lucense na nosa provincia, atraer talento de fóra e avanzar en novos proxectos formativos para asentar poboación nova en Lugo".
A Deputación tamén aposta por converter a provincia de Lugo "nun estudio de cine". Así patrocinou as rodaxes de O sabor das margaridas e Arima e tamén participou nas premiadas O que arde, Dhogs e A sombra da lei.
Rivera explicou que visitaron a Escola de Cine Elías Querejeta porque é "un centro internacional de pensamento, investigación, práctica experimental e innovación pedagóxica, que apoia os creadores de ámbito audiovisual e pretende asentar unhas bases sólidas para un sector de gran potencial non territorio".
Durante a visita á capital guipuscoana tamén se reuniron co director do Festival de Cine de San Sebastián, José Luis Rebordinos, e o responsable de audiovisuais do Tabakalera Centro Internacional de Cultura Contemporánea, Víctor Iriarte.
