O presidente da Deputación de Lugo, José Tomé, enxalzou a "emblemátia" traxectoria e labor realizado na cidade de Lugo pola Asociación de Vecinos do barrio da Milagrosa, que celebra o seu trixésimo aniversario.
Este xoves, Tomé e o presidente da Federación de Asociaciones de Vecinos de Lugo, Jesús Vázquez, selaron un acordo para destinar unha axuda de 20.000 euros á asociación para a realización das actividades que conmemorarán as súas tres décadas de existencia.
En palabras do presidente provicial, trátase dunha asociación "emblemática na cidade de Lugo que cumpre trinta anos visibilizando e dinamizando" o barrio da Milagrosa.
Este mesmo barrio mantivo restricións pola incidencia do coronavirus ata a xornada do mércores, cando a Xunta ordenou que se relaxasen as medidas ante a mellora da situación epidemiolóxica.
Tomé aproveitou para insistir en que "non lle pareceu "ben" pór "o foco deste problema sobre un barrio en concreto, porque o problema é un problema de cidade".
"Era innecesario sinalar co dedo como se fixo, e alégrome moito de que se levantaron esas restricións e que queden ao mesmo nivel do resto da cidade. A Milagrosa non é unha illa aparte, forma parte da capital da provincia e ten que ter o mesmo trato que o resto dos barrios", concluíu.