A Deputación Provincial aprobou este venres un investimento de 32.000 euros para o centro de apicultura situado na parroquia lucense de Teixeiro para mellorar e reformar as instalacións. Así o trasladou en rolda de prensa a portavoz socialista da Deputación de Lugo, Pilar García Porto, tras a xunta de goberno da institución provincial.
"O que fixemos foi aprobar o plan de seguridade e saúde para poder empezar as obras de forma inmediata, uns traballos que esperamos acometer nun breve espazo de tempo", subliñou Porto.
Con este proxecto, o obxectivo é "pór en valor" a materia prima e os produtos autóctonos ademais de renovar as instalacións do inmoble, que alberga "entre 25 e 30 colmeas".
As accións incidirán na reparación da cuberta e substitución e reparación de pezas deterioradas, renovación da iluminación e repintado de toda a zona exterior, xunto con melloras puntuais de carpintería.
Á súa vez, Pilar García Porto anunciou que se aprobou unha subvención de 63.000 euros á Confederación de Empresarios de Lugo para levar a cabo o programa Reinicia-t. A iniciativa inclúe varias accións, como a edición dunha guía práctica para colaborar ou axudar ás empresas e aos traballadores para afrontar e previr o covid-19. "Trátase de poder traballar nas empresas coa maior seguridade posible", resume.
Esta axuda contempla a "recuperación" da "publicación Lugo en cifras que recompila os datos estatísticos de maior interese da provincia, incorporando" reseñas "como indicadores demográficos, datos laborais, económicos, datos de empresas e de tecnoloxías da comunicación e información".
AXUDAS. O presidente da Deputación, José Tomé, asinou convenios con representantes da Fundación Secretariado Xitano, á que achegará 8.000 euros para un programa de formación de mozas, así como de Auxilia, que recibirá do ente provincial 5.000 euros para a mellora da autonomía de persoas con minusvalía.
