O goberno da Deputación de Lugo informou de que está á espera do correspondente informe pericial sobre os danos que sufriu a embarcación para tomar unha decisión con respecto ao futuro do catamarán que se afundiu durante o último temporal en augas do río Miño.
O catamarán Pelegrín I, afundido durante a noite do 19 ao 20 de decembro á altura da ponte das Saamasas, xa foi rescatado e trasladado ao recinto que a Deputación Provincial ten no municipio lucense de Begonte, á espera de que o correspondente informe técnico determine se vale a pena reparalo ou, pola contra, óptase por envialo ao despezamento.
O goberno provincial informou a Efe de que a decisión está pendente da valoración do perito, da que esperan dispor nos próximos días, para determinar o alcance real dos danos sufridos pola embarcación e o custo dunha hipotética reparación.
Namentres, o Partido Popular queixouse de que a embarcación leva xa "varios días deteriorándose" aínda máis "ao aire libre" porque "non cabe" no interior das naves que a Deputación ten no recinto de Begonte.
Ao seu xuízo, "o caso do barco afundido en Lugo é unha clara mostra de como entende a xestión do diñeiro público o goberno bipartito, que forman PSOE e BNG, presidido por José Tomé".
