A Deputación Provincial destinou 185.000 euros para a adquisición de computadores, impresoras de alto rendemento e sistemas de videoconferencia que permitiron renovar o equipamento tecnolóxico do centro asociado da Universidade Nacional de Educación a Distancia (Uned) en Lugo.
O presidente do organismo provincial, José Tomé, visitou este xoves, xunto ao deputado de promoción económica e social, Pablo Rivera, a sede da Uned, onde foi recibido pola directora, Ana Trasera, e o coordinador tecnolóxico, Xavier Fernández.
Tomé destacou que a contratación dese material informático preparou a este centro asociado para "mellorar a calidade dos contidos dixitais da plataforma, que cobraron especial importancia e utilidade coa crise sanitaria derivada da covid-19".
Ao longo do curso académico a Deputación de Lugo impulsa iniciativas e convenios de apoio á Uned por preto de 500.000 euros, deles case 300.000 para os gastos de funcionamento.