O goberno da Deputación de Lugo acometerá os traballos necesarios, valorados en 78.000 euros, para acondicionar 175 hortos urbanos na cidade de Lugo, nas zonas de Paradai e O Rato, dos que poderán beneficiarse as familias lucenses que o soliciten.
Na actualidade, xa existen 150 hortos urbanos na cidade de Lugo, pero a intención da Deputación de Lugo é realizar os traballos necesarios para mellorar as súas condicións, a accesibilidade e para ofertar 25 máis dos que había ata agora.
Para iso traballarase sobre a terra, eliminaranse os vellos peches, colocaranse valos perimetrais feitos en madeira, melloraranse os accesos, crearanse zonas de lecer -para descanso dos beneficiarios- e haberá áreas exclusivas para que poidan traballar escolares e persoas con mobilidade reducida.
Ademais, o goberno provincial elaborou un plan de boas prácticas co que pretende que os beneficiarios lle saquen o máximo partido aos hortos urbanos de Lugo.
En canto á asignación dos mesmos, o portavoz do goberno provincial, Álvaro Santos, precisou que só pode haber "un beneficiario por familia" e que a repartición se fará "mediante sorteo público".
Tamén se respectarán os dereitos daquela xente que xa ten nestes momentos un horto na zona habilitada pola Deputación.
A Deputación creará 175 hortos urbanos na cidade de Lugo
Estarán situados nas zonas de Paradai e O Rato e o seu acondicionamento está valorado en 78.000 euros
