Tanto o presidente da Deputación Provincial, José Tomé, como a alcaldesa da cidade, Lara Méndez, felicitaron este martes á directiva, xogadores e corpo técnico do Club Deportivo Lugo por lograr no último partido da tempada a súa permanencia na Segunda División do fútbol español, logo de nove tempadas consecutivas na categoría.
A rexedora local recoñeceu que "é un día importante para Lugo, para a provincia e para a cidade", polo que agradeceu ao club "ese traballo e ese esforzo final" que permitiu certificar a salvación no último partido da tempada.
Recordou que todo o equipo foi capaz de transmitir "ilusión" e "forza" para conseguir "ese obxectivo", a pesar das "dificultades que isto implica", pola "competitividade que hai nesta categoría". Ao seu xuízo, por iso ten "maior mérito".
Felicitouse, así mesmo, de que o club contribúa a fortalecer "o sentimento de cidade" e a levar "o nome de Lugo" por todo o territorio nacional.
Pola súa banda, o presidente da Deputación recordou que "é importante" que o club se manteña na Segunda División, e polo tanto no fútbol profesional, porque iso "ten unha repercusión" directa no que se refire á promoción da cidade e da provincia "no conxunto do estado".
Ademais, precisou que os equipos que veñen competir a Lugo arrastran consigo a centos de afeccionados que despois se converten "en embaixadores" da provincia cidade.
