O presidente da Deputación de Lugo, o socialista Xosé Tomé
Así explicou ese compromiso nunha intervención final, onde chegou a cortar á portavoz popular Elena Candia o micrófono porque non estaba na quenda de palabra, na que afeou que non se lle deixaron "os cen días de cortesía", xa que pasaron "22 días" desde a súa toma de posesión.
Tamén lle recordou á bancada popular que un dos alcaldes, o de Pantón (do PP), si lle creu cando lle prometeu que nese Concello habería residencia a pesar de que só conta cun protocolo para a súa construción.
á súa vez recriminoulle á portavoz popular que dixese que o orquestrara "un golpe de estado" para desbancar ao seu predecesor, Darío Campos. "A vostede fóiselle a pota", espetoulle e fixo fincapé en que fora elixido de forma democrática deputado provincial e despois presidente provincial.
Así mesmo, nesa alegación final, aconselloulle a Candia que non se despistase" porque "no seu partido hai movemento de tropas", co que quixo pechar o pleno que intentou interromper a popular e que a cortou "ao non ter a palabra".
COMPETENCIA. En canto ás residencias o que mantivo é que non se farán máis das proxectadas, facendo valer que esa é unha competencia da Xunta de Galicia, a atención a maiores, que recolle a "Constitución" galega, segundo comentou, en relación ao Estatuto de Autonomía.
Son tres as residencias as que xa funcionan, en Trabada, Ribadeo e Pol, e os restantes 15 localízanse na Fonsagrada, A Pontenova, Becerreá, Castroverde, Cervantes, O Coruel, Guitiriz, Meira, Navia de Suarna, Ourol, Pantón, Pedrafita, A Pobra do Brollón, Portomarín e Ribas de Sil.
A portavoz dos populares, Elena Candia, puxo o acento en que están "ante un dos proxectos probablemente máis importantes que ten a institución". "E que afecta non só a concellos, senón aos nosos veciños e aos nosos maiores", abundou.
Por parte do BNG, socios de goberno do PSOE, o seu portavoz Efrén Castro acusou a Candia de intentar "sementar dúbidas" nun afán, dixo, "electoralista". Tamén culpou á Xunta de que a Deputación tivese que asumir competencias "impropias" polo "desprezo do Goberno galego á apertura de residencias e aos maiores da provincia".
Finalmente, a suma de 13 deputados do goberno provincial evitou esa proposta lanzada polo PP de acordo "plenario relativo á clarificación do futuro" da rede de residencias. Ao pleno acudiron moitos dos alcaldes que teñen comprometidos estes centros de atención a maiores.
