viernes. 24.09.2021 |
El tiempo
viernes. 24.09.2021
El tiempo

A Deputación aproba un convenio para redactar o proxecto do polígono da Fonsagrada

Pilar García Porto. EP
Pilar García Porto. EP
Pilar García Porto recordou que o ente provincial "xa ten comprometidos preto de 600.000 euros para acometer as obras", ademais doutros 150.000 que consignará o propio Concello da Fonsagrada

A portavoz do goberno da Deputación de Lugo, a socialista Pilar García Porto, anunciou, tras a Xunta de Goberno, a aprobación dun convenio para a redacción do proxecto do polígono industrial no concello da Fonsagrada.

Un convenio que subscribirán o presidente provincial e o alcalde, para sacar "a contratación os traballos de redacción deste proxecto, para o que se achegarán 35.750 euros desde a Deputación", explicou.

Porto avanzou o "compromiso" do goberno provincial de Lugo cos concellos, "de máxima colaboración para sacar adiante servizos e infraestruturas necesarias e demandadas polos veciños".

Seguidamente recordou que o ente provincial "xa ten comprometidos preto de 600.000 euros para acometer as obras deste polígono industrial", ademais doutros 150.000 que consignará o propio Concello da Fonsagrada.

Tamén na xunta de goberno aprobábase "o programa para a dotación e mellora de servizos comunitarios, neste caso trátase dunha nova liña de axudas de concorrencia competitiva que conta cun orzamento de 300 mil euros, para entidades asociativas de toda a provincia co obxectivo de colaborar na mellora da calidade de vida dos veciños e veciñas, sobre todo os que están no rural".

Esta nova "liña de subvencións" persegue "seguir reforzando a cooperación co tecido social e veciñal da provincia", con axudas que oscilarán entre os mil e os 6.000 euros.

Mudanza dos servizos provinciais

Finalmente, o goberno provincial tamén acordou destinar máis de 41.000 euros para "a mudanza" dos servizos provinciais que se emprazarán no antigo Fogar de Santa na Rolda da muralla.

En agosto iniciaranse os traballos de mudanza e en dous meses confíase xa ter alí instalados os servizos de recadación, medio ambiente, asistencia aos concellos, formación e asistencia xurídica.

A Deputación aproba un convenio para redactar o proxecto do...
comentarios