A dimisión do edil de urbanismo sostible, Miguel Couto, anunciada este venres polo Concello, abrirá a primeira crise no goberno municipal encabezado pola socialista Lara Méndez e en coalición co BNG. O Concello alega exclusivamente "motivos persoais" nesta decisión. Mentres tanto, Miguel Couto permanece en silencio, sen dar explicacións da causa desta renuncia ao seu cargo de concelleiro, que se materializará o pleno do próximo xoves.
A marcha de Couto suporá a primeira reorganización do goberno municipal dado que o próximo candidato da lista, o número nove, que terá oportunidade de converterse en concelleira é a profesora Silvia Alonso, cuxo perfil non encaixaría, nun principio, como substituta de Couto na área de urbanismo, xa que non é nada técnico, tal e como o require esta área.
Aínda que o Concello insiste en que só hai razóns persoais na dimisión e en que nunca houbo diferenzas de criterio entre o concelleiro e a alcaldesa, os nomeamentos recentes de xefes de servizo na área de urbanismo non foron do agrado de Miguel Couto, o que puido dar pé á decisión de marcharse do goberno local. De feito, preguntado no seu día por este xornal polos cambios na súa área dixo: "Dese tema non vou falar".
Neste sentido, o gabinete de prensa da Alcaldía asegura -a falta de declaracións de Lara Méndez sobre este tema- que a persoa que o edil dimisionario quería para o posto de xefe de arquitectura non se axustaba a criterios técnicos, como fixo constar o interventor nun informe.
"Non houbo ningunha diferenza coa alcaldesa. Lara Méndez deixou liberdade a todos os concelleiros para que elixisen aos xefes de servizo das súas áreas entre a xente que se presentou para eses postos e Lara apoiou as súas decisións, tamén a de Miguel Couto. Pero, aínda que son postos de confianza, a súa cobertura está regulada e fiscalizada, como non podía ser menos".
Por outra banda, a ausencia de Miguel Couto na toma de posesión dos xefes de servizo da súa área non foi, segundo o gabinete de prensa da Alcaldía, indicador en absoluto do desacordo do concelleiro dimisionario sobre estes nomeamentos, xa que aseguran que non é obrigatoria a asistencia dos edís a estes actos e outros concelleiros tampouco acudiron noutras ocasións. Só é obrigatoria a presenza da alcaldesa e da edil de gobernanza, Paula Alvarellos, engaden.
