Un lucense recoñeceu ante o xuíz que non lle pasou a pensión de alimentos á súa filla durante tres anos, pero alegou que non houbo ningún tipo de intención "maliciosa". A xuíza, con todo, conclúe o contrario e condénao por un delito de abandono de familia.
Segundo explicou o home, non pagou a pensión porque descoñecía por completo a vida da súa filla e, polo tanto, non sabía se estudaba ou xa traballaba, xa que non mantiña ningún contacto con ela.
O xuíz, pola contra, considera que o seu argumento non se sostén, xa que a sentenza de divorcio xa recollía que o pai tiña a obrigación de contribuír á metade dos gastos extraordinarios da nena con motivo dos seus estudos universitarios. De feito, os dous proxenitores debateron sobre a posibilidade de enviar á súa filla a cursar os seus estudos a unha universidade privada ou matriculala nunha pública.
A titular do Penal número 1 de Lugo conclúe así que o home tivo "unha vontade consciente e mantida no tempo de non afrontar as súas obrigacións económicas como pai, nin sequera cunha mínima cantidade que permitise valorar a súa capacidade económica".
A xuíza condena ao home como autor dun delito de abandono de familia e imponlle unha multa de 1.800 euros. Ademais, obriga ao acusado a indemnizar á súa filla na cantidade de 8.864 euros por todas as pensións de alimentos que non lle pasou —desde setembro de 2012 ata o mes de febreiro de 2015— e a pagar a metade de todos os gastos extraordinarios de educación e residencia, aplicando as tarifas e taxas da Universidade de Santiago de Compostela
