Axentes da Policía Nacional de Lugo detiveron o pasado luns a un home, veciño da capital, como presunto autor dun delito de estafa, xa que se fixo pasar por empregado dunha empresa para conseguir material de obra por un valor aproximado de mil euros.
O home traballaba nunha empresa do sector da construción, sita no municipio de Lugo, e foi despedido o pasado día 20.
Con todo, pouco despois, acudiu a dous almacéns da cidade e finxiu que seguía sendo empregado da mesma firma. Deste xeito, conseguiu levar diverso material de obra sen ter que abonalo no momento. O detido asegurou que o enviou o seu xefe e asinou incluso os albaranes nos que figuraban todos os artigos que solicitou.
Os empresarios afectados pola estafa denunciaron os feitos en canto déronse conta do engano e a Policía Nacional de Lugo abriu unha investigación, que se saldou coa identificación do presunto autor.
O home, que non tiña antecedentes ata o momento, foi detido o luns pasado e trasladado á comisaría da Rúa Chantada, onde quedou en liberdade tras prestar declaración sobre a presunta estafa. Os investigadores trasladaron as dilixencias ao xulgado de garda da capital para que adopte as medidas que considere.
