Axentes da Policía Local de Lugo detiveron, logo dunha espectacular persecución pola cidade, un condutor que se deu á fuga cun coche que fora inmobilizado, intentou atropelar un dos policías que o seguían e deu positivo por consumo de cocaína.
Os feitos iniciáronse preto da medianoite do xoves, cando unha patrulla do Grupo Operativo Nocturno da Policía Local de Lugo observou que un vehículo circulaba de forma "irregular" pola rúa Valle Inclán. Cando lle deron o alto, viron que o condutor presentaba síntomas claros de ter bebido, de modo que foi sometido ao control de alcoholemia, no que deu unha taxa de 0,90 miligramos por litro de aire expirado, case catro veces máis do permitido pola lei.
Por iso, os axentes inmobilizaron o vehículo e trasladaron o condutor á Unidade de Atestados, para instruír dilixencias por un suposto delito contra a seguridade viaria.
Algo despois, sobre as 2.10 da madrugada, a patrulla viu que o vehículo que inmobilizara estaba a circular de novo e comprobou que era o acompañante do condutor parado na rúa Valle Inclán quen ía ao volante.
Cando os axentes lle deron o alto, no canto de deterse, emprendeu a fuxida a gran velocidade pola rúa Angelo Colocci e a Avenida da Coruña, para acabar virando bruscamente e meterse nun descampado —fronte ao número 490 da avenida—, onde foi interceptado polos axentes.
Os axentes ordenáronlle que apagase o motor e puxese as chaves sobre o teito do vehículo, pero o condutor deu marcha atrás bruscamente, o que obrigou a un dos axentes a lanzarse ao carón para evitar ser atropelado.
Aproveitou a situación para fuxir de novo, pero foi localizado pouco despois na Rúa Alvedro, onde deixou estacionado o vehículo e intentou fuxir á carreira. Finalmente, os axentes atopárono tirado nunha horta, escondido entre a maleza.
Xa nas dependencias policiais, o sospeitoso negouse a someterse ás probas de alcol, aínda que si dixo que escapara da patrulla para evitar o control, porque bebera máis da conta". Ademais, nunha analítica realizada nun centro médico deu positivo por consumo de cocaína.
A Policía Local instrúe dilixencias por un delito contra a seguridade viaria, pero tamén por condución temeraria e por atentado a axentes da autoridade, polo intento de atropelo.
