Axentes do Corpo Nacional de Policía detiveron a un dos dous individuos que o pasado 26 de decembro esperaron a unha veciña de Lugo no portal da súa casa, coa cara tapada por un pasamontañas, para roubarlle o diñeiro que tiña previsto ingresar para pagar o aluguer da súa vivenda, logo de ameazala cun coitelo e de pegarlle.
Os feitos ocorreron ao redor das 08.15 horas da mañá, cando a vítima saíu da súa casa para ingresar nunha entidade bancaria os 540 euros do aluguer da súa vivenda.
Os dous individuos, acazapados no portal, ao parecer abalanzáronse sobre ela, puxéronlle un coitelo no pescozo e dixéronlle: "Dános o diñeiro, non sexas boba, ou lastimámoste".
Logo de apoderarse do botín, déronlle "unha forte puñada no estómago", que a deixou sen alento e en estado de shock", explica a Policía Nacional nun comunicado.
A investigación da Policía, grazas aos datos achegados pola vítima, permitiu identificar a un dos agresores, un mozo de 27 anos de idade, con antecedentes, que este mércores foi detido e posto a disposición xudicial.
