Axentes da Policía Nacional detiveron un mozo que supostamente atacou a outro con gran violencia e lle causou feridas de gravidade. O altercado produciuse sobre as catro e cuarto da madrugada do sábado, cando os implicados se atopaban na Rúa Clérigos, unha das zonas de copas máis concorridas do centro histórico.
Os implicados iniciaron unha discusión e comezaron a insultarse e a gritarse cada vez máis, ata que chegaron ás mans. Nun momento do enfrontamento, segundo a versión dalgunhas testemuñas, un dos implicados comezou a golpear a outro de forma brutal na cabeza, polo que varias persoas telefonaron á sala do 091 para alertar á Policía.
Nada máis recibir as chamadas, varias patrullas trasladáronse ata o lugar indicado e atoparon a vítima tombada no chan e malferida, pero o agresor xa se dera á fuga. Tanto o ferido como varias testemuñas identificaron sen dúbida ao presunto autor da malleira e os axentes conseguiron localizalo pouco despois.
O mozo foi detido e a Policía trasladouno ata o Hospital Universitario Lucus Augusti, xa que presentaba algunhas lesións de carácter leve.
O agresor, natural de Lugo e con varios arrestos anteriores, fuxiu do lugar tras o ataque, pero a Policía Nacional localizouno
FERIDAS. A vítima, pola súa banda, tamén foi levada ao Hula en ambulancia. O ferido recibiu unha primeira asistencia médica no servizo de Urxencias do centro hospitalario e posteriormente quedou ingresado, xa que presentaba múltiples lesións e feridas incisas na cara e na cabeza.
Tal e como sinalaron algunhas persoas que presenciaron o ataque, o agresor pegoulle "con moita forza", aínda que non utilizou armas brancas nin ningún outro obxecto cortante. "O pobre mozo levaba a cara esnaquizada e sangraba moito pola cabeza. Tiña varios cortes, pero foi dos golpes que recibiu", comentou unha testemuña.
O altercado levantou unha grande expectación de madrugada na Rúa Clérigos, xa que a esa hora aínda había moita xente entrando e saíndo dos locais de lecer situados na zona.
Segundo confirmaron desde a comisaría lucense, tanto o agresor como a vítima son naturais de Lugo e os dous contan con arrestos anteriores.
Ambos permanecían o sábado no Hula; a vítima, ingresada polas lesións que sufriu, e o agresor —custodiado por axentes da Policía Nacional—, á espera de obter unha valoración psicolóxica.
