Detido un menor por atacar sen motivo a outro mozo e romperlle un óso da cara

Axentes da Policía Nacional de Lugo detiveron un mozo, menor de idade por atacar a outro de madrugada sen motivo e romperlle un óso da cara.

O altercado rexistrouse o 29 de decembro nunha zona de lecer próxima á catedral. Esa noite, dous mozos que se atopaban no exterior dun pub foron abordados por outro mozo, que atacou a un deles sen mediar palabra. O agresor propinoulle á vítima varias puñadas na cara e deixouno aparvado, sen chegar a tiralo ao chan. O agresor ameazou tamén con golpear ao outro mozo, que quedou paralizado e non foi capaz de reaccionar. Finalmente, o autor da agresión marchouse do lugar.

A Policía Nacional abriu unha investigación e logrou identificar ao autor da puñada, que foi explorado en comisaría en presenza da súa nai

A vítima tivo que ser trasladada ao Hospital Universitario Lucus Augusti, onde lle curaron as feridas. Con todo, tras un exame pormenorizado, os sanitarios comprobaron que presentaba rotura do óso orbital esquerdo.

A Policía Nacional abriu entón unha investigación, cos datos achegados pola vítima e polas testemuñas, e lograron identificar ao agresor e a outro mozo que o acompañaba. Os axentes localizaron ao autor das lesións no seu domicilio, no barrio de Paradai, e procederon ao arresto.

O mozo foi trasladado á sede policial da Rúa Chantada, onde foi explorado en presenza do seu avogado e da súa proxenitora, tal e como estipula a lei do menor. Posteriormente, foi posto en liberdade, a cargo dos seus pais, e os investigadores trasladaron o expediente á Fiscalía de Menores.