Axentes do Corpo Nacional de Policía (CNP) detiveron en Lugo un home de 30 anos, nacido en Madrid e con antecedentes, por un delito de lesións graves. Segundo informou a Comisaría Provincial de Lugo, os feitos ocorreron durante a madrugada do pasado 2 de febreiro, cando o detido tivo un "encontrón" con outro mozo ao que coñecía previamente cando ambos estaban de copas na zona da Tinería.
De acordo co testemuño do agredido, o agora detido colleu unha botella de cristal e arremeteu con ela contra el. Por mor desa agresión, o outro novo tivo que recibir asistencia médica no Hula, onde recibiu cinco puntos de sutura.
Posteriormente, a través das redes sociais, ambos os implicados intercambiaron inxurias e ameazas. Presentada a correspondente denuncia na Comisaría Provincial, a Policía Nacional identificou, localizou e detivo ao autor das lesións, que hoxe pasará a disposición xudicial.