Axentes do Corpo Nacional de Policía (CNP) detiveron a un suposto ladrón que utilizaba unha barra de ferro para forzar coches estacionados na vía pública para roubar os obxectos de valor que había no seu interior.
A detención do sospeitoso, un home de 44 anos de idade, foi posible grazas á colaboración cidadá, dado que unha veciña da rúa Isaac Díaz Pardo chamou a última hora da tarde do sábado 6 de febreiro para avisar á Policía de que estaba a ver a un home cunha barra de ferro que ía "tentando" as fechaduras dos coches aparcados nesa vía.
Inmediatamente, as patrullas de servizo trasladáronse ao lugar indicado e os axentes localizaron ao sospeitoso acazapado tras un dos coches aparcados nesa rúa.
Xunto a el estaba a barra de ferro e, ao cachealo, tamén lle atoparon unhas luvas e unha lanterna, ademais de diversos obxectos sacados dos coches que forzara.
Os coches presentaban danos nas portas, por ser forzadas as súas fechaduras, e o seu interior estaba "totalmente revolto", segundo informou a propia Policía Nacional. O detido foi posto a disposición da autoridade xudicial, aínda que quedou en liberdade tras prestar declaración, á espera de xuízo.