A Policía Nacional de Lugo detivo a un home como presunto autor do roubo cometido hai un par de semanas nunha céntrica xoiería da capital lucense. O ladrón forcexeou co propietario do establecemento e finalmente logrou apoderarse dun anel, que foi recuperado polos axentes.
O suceso produciuse o pasado día 9, cando un mozo -de cara e sen portar arma ningunha- entrou nunha xoiería da Rúa Nova e pediulle ao dono que lle mostrase uns aneis. De súpeto, colleu un e emprendeu a fuxida, pero o xoieiro intentou impedirllo e o ladrón forcexeou con el. Finalmente, o delincuente logrou o seu obxectivo e marchou coa xoia.
O afectado denunciou os feitos na comisaría e o Grupo II da Policía Xudicial abriu unha investigación para localizar ao asaltante. Os axentes interrogaron a varias testemuñas e finalmente identificaron ao presunto autor do roubo, un mozo de orixe colombiana con residencia en Lugo. O home foi posto a disposición xudicial e decretouse o seu ingreso en prisión, xa que conta con antecedentes. Os investigadores tamén recuperaron o anel roubado nun establecemento de compravenda de ouro da cidade.
GASOLINEIRA. A xuíza de Instrución número 1 de Lugo tamén enviou a prisión a un dos dous detidos por atracar a gasolineira da Campiña na madrugada do pasado día 14 e atar a un empregado. O seu colega, pola contra, quedou en liberdade con cargos.
A investigación que permitiu o arresto dos atracadores correu a cargo do Grupo II de Policía Xudicial. Os axentes localizaron aos autores aos poucos días do suceso e comprobaron que un deles tiña no seu poder un coitelo e dúas machadas, precisamente as armas que, segundo explicou a vítima, utilizaron para ameazalo. O mesmo home tamén gardaba unha mochila cunha braga no seu interior, coa que supostamente cubriu de forma parcial o rostro durante o asalto.
O afectado explicou que os atracadores o ataron para que non entorpecese os seus movementos e revolveron todas as instalacións en busca de diñeiro, logrando apoderarse dun botín que roldaría os 400 euros. Acto seguido, déronse á fuga. Os dous ladróns, acusados de roubo con violencia e intimidación, son veciños de Lugo.
