A Policía Local detivo na noite do sábado ao domingo un lucense por agredir supostamente a súa parella e ameazala cun coitelo. Os axentes do Grupo Operativo Nocturno acudiron ao domicilio, sito na rúa Escultor Asorey, sobre a unha da madrugada, logo de recibir unha chamada na Sala do 092 porque supostamente un home estaba a agredir a súa compañeira sentimental.
Unha vez alí, os policías foron recibidos por unha muller, "que tiña a roupa manchada de sangue e un forte golpe na cella dereita", quen lles explicou que non estaba soa e que a súa parella tiña un coitelo. Os axentes rexistraron o domicilio e localizaron o home nunha habitación do inmoble, apoiado contra unha parede, pero non atoparon ningunha arma branca.
A Policía Local detivo o presunto agresor como autor dun delito de violencia de xénero e nun principio o home mostrouse colaborador. Con todo, no traslado a comisaría, comezou a insultar e a ameazar aos axentes, chegando a golpear "violentamente" o biombo de protección do vehículo policial, polo que tivo que ser reducido e inmobilizado.
