A Policía Nacional de Lugo actuou de novo nunha compravenda de turismos do barrio da Residencia tras recibir a denuncia dun cidadán que acudiu ao negocio para adquirir unha motocicleta e supostamente estafárono. A intervención policial saldouse cun detido, que quedou en liberdade tras prestar declaración en comisaría.
As pescudas sobre este negocio -que suma xa polo menos 14 denuncias nos últimos anos, sete delas ao longo de 2016- iniciáronse o pasado mes de maio, cando un lucense denunciou que o enganaron. Segundo explicou o mozo, acudiu un día ao establecemento e negociou cun dos seus responsables o intercambio dun turismo e unha motocicleta da súa propiedade por unha moto máis nova. Tras fixar as condicións, as partes asinaron un contrato de compravenda.
"Con todo", explicou o portavoz policial, "nese momento empezou para o denunciante un camiño cheo de fochancas, xa que se atopou con que a motocicleta non estaba a nome do vendedor, senón dun terceiro, e para lograr pola ao seu nome tivo que realizar varias xestións de forma persoal e non a través dunha xestoría, tal e como acordara co vendedor, o que lle carrexou ter que abonar todos os gastos referentes á transferencia". O afectado atopouse ademais con outros problemas, como que os impostos municipais pertinentes estaban sen pagar.
Outro dos responsables da empresa xa foi detido en 2016 e pechou o negocio. Posteriormente retomouse a actividade e as denuncias
Os policías investigaron os feitos e chegaron á conclusión de que na trama había implicadas tres persoas, "dúas das cales aínda están pendentes de localizar". O detido foi a persoa que negociou a venda pero, segundo os investigadores, no contrato que asinou co denunciante utilizou os datos e falsificou a firma dun terceiro, "que era a persoa que entregara o vehículo no concesionario e co que asinara un contrato de compravenda".
PRECEDENTES. A compravenda de coches denunciado, situado na Rúa da Pomba, conta xa con outras trece denuncias anteriores, sete delas interpostas en 2016. De feito, no mes de decembro dese ano, a Policía Nacional xa detivo ao dono de Caballero Motor e investigou a un empregado por estafar a varios clientes.
Os afectados deixábanlle os turismos en depósito no negocio e o home vendíaos, pero supostamente quedaban o diñeiro.
Nalgunhas ocasións, nos contratos de compravenda reflectía cantidades menores das que realmente recibía, mentres que noutras, apropiábase directamente da contía total da venda. Ademais, a estafa estendíase tamén aos compradores, xa que segundo puideron comprobar os policías, o detido non lles entregaba toda a documentación que lles correspondía.
Naquel momento, o Facebook da empresa encheuse de comentarios no que varios clientes acusaban o establecemento de ser un "sitio de estafadores", polo que finalmente, o detido pechou as instalacións.
O home detido nesta ocasión non é o mesmo que foi arrestado hai tres anos, pero os investigadores cren que pertencen á mesma trama e vincula as detencións.
As investigacións foron realizadas polo Grupo IV da Brigada Provincial de Policía Xudicial da comisaría de Lugo.
