O lucense detido en febreiro de 2020 por acabar presuntamente coa vida da súa parella no seu domicilio das Gándaras foi condenado o martes por agredir o seu proxenitor, hai xa tres anos. O acusado, Francisco Javier Belda Fernández, declarou por videoconferencia desde o cárcere e recoñeceu os feitos, polos que aceptou unha condena de 56 días de traballos en beneficio da comunidade.
A agresión, tal e como consta no escrito de acusación da Fiscalía de Lugo, tivo lugar o 3 de xullo de 2018, cando o home chegou ao domicilio familiar no que convivía cos seus proxenitores e discutiu co seu pai. No transcurso do enfrontamento, Francisco Javier Belda propinoulle ao home unha labazada na cara, agarrouno fortemente polo pescozo e tirouno ao chan contra unha butaca. A vítima non sufriu lesións por estes feitos nin acudiu ao médico, pero o agresor foi acusado dun delito de malos tratos.
O ministerio público solicitou inicialmente por este altercado unha condena de seis meses de prisión, pero o acusado recoñeceu este martes os feitos ante o xuíz e as partes chegaron a un acordo para fixar a pena en 56 días de traballos en beneficio da comunidade, que compaxinará coa súa estancia en prisión provisional polo crime das Gándaras.
Ante a conformidade alcanzada por acusación e defensa, o xuízo xa non tivo que celebrarse e a vítima non declarou. Con todo, os proxenitores de Francisco Javier Belda solicitaron insistentemente ao xulgado que lles permitise saudar ao seu fillo a través de videoconferencia antes de cortar a conexión, ao que o maxistrado accedeu. Os pais interesáronse polo estado do seu fillo no cárcere e despedíronse del con expresións de apoio e de agarimo. "Querémoste moito fillo; se bo", díxolle a súa proxenitora.
Precisamente, o día do seu arresto pola morte da súa compañeira, o acusado atopábase na vivenda dos seus pais, que se atopa a apenas 250 metros de distancia do domicilio no que supostamente acabou coa vida da súa parella, sito na Rúa da Ferradura. O cadáver da muller, que tiña dous fillos, un deles menor de idade, fora localizado a noite anterior pola súa nai. Estaba no cuarto de baño e presentaba unha coitelada no pescozo. Ao parecer, o detido recoñecera a varios achegados seus que matara á súa parella unhas 36 horas antes de que fose localizado o seu corpo sen vida e que incluso pasara a noite no domicilio tras o crime.
